前两日推荐咗《亲亲我好妈》，嗰时我就讲过呢部戏畀佢个“师奶味”剧名埋没。
其实咁多年嚟，TVB帮自己嘅剧集改名，经常令人哭笑不得，趁周末就嚟盘点下！
《迷》：剧情如名，迷一样嘅名称
最近开播嘅《迷》，有郑嘉颖加田蕊妮，本来谂住睇下，不过有评论都话，呢部剧嘅剧情同戏名一样，好似一个迷！播咗几集都唔知想讲咩！
唔知睇过嘅自己友又有咩睇法呢？
《巴不得》系列：你究竟巴不得你老窦老母做咩呢？
第一次见到呢个剧名，粤语十级嘅我连续读咗十次都唔明系咩意思，后来先留意到原来剧名后面系有串省略号“…”。
根据剧组PA透露，剧名嘅意思其实系“巴不得爸爸……（此处根据观众理解加入某件事）”，比如“巴不得爸爸唔好咁孤寒老土”。
咁睇嚟，呢个剧名同儿子穿越到父亲年代嘅剧情好贴合！（呢部港剧的确唔错，我之前都写文章推荐过→借《乘风破浪》，推荐你哋一部旧作）
《鱼跃在花见》：每个中文字我都识，就系唔知点解？
神奇嘅剧名，因为第一眼睇真系觉得不明觉厉，无从解释！
后来我百度先知道，剧名系暗指两兄弟经历蜕变，鱼跃龙门，继而达到如花灿烂嘅人生。
编剧，我哋改个名遮，唔使咁多套路啊！不过当年支撑我睇完呢出戏嘅，系张智霖嘅颜值！其他就真系一般般啦！
《四个女仔三个bra》：吓得我以为系套“四仔”！
第一次见到呢部戏嘅名，吓得我以为TVB竟然开始出限级片，卖“四仔”！
后来戴返副老花先睇清楚，剧名入边嘅系“bra”，唔系“bar”！（嚟，大家一齐去面壁！）
呢度嘅Bra系指barrister，即系大律师，因为四个女主角之中，有三个系大律师，所以就叫《四个女仔三个bra》。
至于呢部戏好唔好睇，一句话概括，呢部戏有陈港姐！
《点解阿sir系阿sir》：确认呢句唔系一句废话？
呢个剧名，唔明粤语或者香港文化嘅人好难理解到入边嘅含义。
喺香港，男教师叫阿sir，男警察都系叫阿sir，剧入边男主角系个警察，乔装成一个老师入一间学校调查案件，呢个剧名一语双关，点明咗核心剧情。（但系剧情真系好似《逃学威龙》）。
《狙击》系列：TVB起名经典套路，我都唔明你哋狙击啲咩？
《学警狙击》《潜行狙击》《法网狙击》《神枪狙击》《乘胜狙击》 ……
好似真系自从《学警狙击》开始，TVB嘅编剧就莫名其妙中咗毒，隔一两年就出一部“狙击”系列嘅电视剧！
感觉“狙击”已经成为咗TVB嘅一个大IP，但系我都唔明白啲戏剧情同“狙击”有咩联系？你又有冇咁多嘢要狙击啊！
而最好睇，肯定、依然、永远都系《潜行狙击》！
《鬼同你OT》《EU超时任务》：中西合璧会更营养均衡，更健康？
其实呢两个剧名都唔系好难理解，前提系你要英文够好！
《鬼同你OT》系指女主角姜蓉（胡定欣 饰）加班嘅时候遇到意外身亡，变咗鬼魂，然后附身喺另一个女主孙淑梅（田蕊妮 饰）身上，真系搵鬼同你OT啦！
《EU超时任务》嘅女主凌晨风（朱千雪 饰）本身系冲锋队（英文简称EU），遇到意外可以穿越时空，改变过去。剧名嘅大概意思系一个EU超越时空完成自己嘅任务。
《老表你好X》系列：除咗第一部，其他都唔系老表啊！
王祖蓝创作嘅经典黑色幽默港剧，第一部入边，郭晋安同王祖蓝系远房亲戚，名义上系表兄弟，所以“老表，你好嘢”带有戏谑意味。
而第两部、第三部同第一部嘅制作班底相同，演员阵容重合度好高，所以剧名就继续沿用“老表XXX”，变成咗一个品牌！
《师父·明白了》：你明白咗，但系我乜都唔明啊！！！
虽然啲完呢部，我中意咗黄浩然同黄翠如，但系我都必须要承认一点，
其实我冇睇明成部戏想讲咩！！！
剧名剧情好似好有深度，好有寓意，但我get唔到个point咯！
《师父·明白了》我可以大概估到系光头仔初一箭（黄浩然 饰）经历世间情爱，人生起伏而参悟出真理。
不过，方唔方便解析下，你究竟从头到尾明白咗啲咩？！！！我真系好迷茫咯！
仲有
《好心作怪》
《诱情转驳》
《纯熟意外》
……
呢啲就由你哋帮手解释啦！
或者，讲出你最无法理解嘅剧名，
我哋一齐帮你解答！
想获得更多好剧、好片资讯，快啲加入【自己友睇片】群，同你一样追港剧嘅自己友喺群度等你。
后台回复【追剧】获得进群入口，或者直接加羊城网阿咩微信：gznffans，备注【追剧】，等佢拉你入群喇！
本文看点由羊城网原创
特此声明
发表评论